Reclamaçom de liberdade de Telmo e Miguel presentes na mobilizaçom obreira de 6 de novembro

Ativistas do CSAMT despregárom umha gigantesca faixa na confluência entre a rua Urzaiz e a Gram Vigo de Vigo ao passo da manifestaçom em defesa do emprego convocada por várias organizaçons sindicais.

Durante o percorrido da mobilizaçom operária fôrom lançadas as palavras de ordem "Telmo, Miguel liberdade", "Nom pode ser obreiros na cadeia corruptos no poder", “Presos à rua, a luita continua", "A luita obreira nom é delito", enquanto se distribuiam centenares de exemplares do panfleto que reproduzimos integramente. Posteriormente CSAMT incorporou-se à manifestaçom que finalizou na Porta do Sol.

O manifesto também foi difundido na manifestaçom realizada em Ferrol.

A luita obreira nom é delito
Telmo, Miguel liberdade

Miguel Nicolás leva quase onze meses preso, e Telmo Varela oito. Neste período ambos fôrom dispersados longe do seu País. Miguel está encarcerado em Astúrias e Telmo na prisom espanhola de Dueñas (Paléncia).

Miguel atualmente está em regime de isolamento, castigado por defender a sua dignidade como preso.

As causas polas que ambos fôrom presos e “condenados mediaticamente” nom se sustentam. A Fiscalia apoia-se em “provas” fruto de umha montagem policial. O sumário ainda nom se fechou e portanto o seu juízo ainda nom está datado.

Apenas razons de índole estritamente política permitem explicar por que nom se lhes concede a liberdade condicional e seguem sendo tratados polos mass-media da burguesia como “terroristas” segundo a sua terminologia.

Porém, Miguel e Telmo som dous operários do metal de Vigo conscientes da exploraçom que padece a classe obreira e portanto comprometidos na luita pola nossa emancipaçom.

A sua combatividade e firme compromisso com um modelo de sindicalismo nom pactista e combativo explicam por que estám a ser castigados com tanta dureza polo Estado espanhol.

Hoje nom podem estar connosco fisicamente, mas sim nos acompanham à hora de luitarmos contra o desemprego e a precariedade laboral, à hora de fazer frente às agressons do patronato e a burguesia, à hora de defender o setor naval.

Telmo e Miguel sabem que a ofensiva do Capital só se pode parar com a organizaçom obreira e popular, com a luita. A política de pactos sociais e conciliaçom de classes é corresponsável da grave situaçom que hoje atravessamos.

Nunca se resignárom nem se conformárom a viverem como escrav@s. Formam parte do melhor proletariado galego. Som pois um exemplo a seguir. A classe obreira galega necessita mais Telmos e mais Migueis.

Reclamar a sua imediata liberdade é um dever de toda trabalhadora e todo trabalhador.

O Comité de Solidariedade e Apoio a Miguel e Telmo (CSAMT) apela ao conjunto do povo trabalhador a secundar ativamente todas aquelas iniciativas solidárias com Miguel e Telmo. Apoiar economicamente os dous camaradas presos, enviar mensagens de apoio e ánimo.

Nom pode ser, obreiros na cadeia, corruptos no poder!!
Presos à rua, a luita continua!
O capitalismo é o terrorismo!