Hoje percorreu às 12h no local da CUT a apresentaçom publica do Comité de Solidariedade e Apoio a Miguel Nicolás Aparício (CSAM).
Luzia Leirós, Telmo Varela e Xavier Moreda, -acompanhad@s por representantes de diversas organizaçons integradas no Comité-, agírom como portavozes dando a conhecer os objectivos do Comité, a situaçom judicial e carcelária atual na que se atopa o jovem trabalhador do metal filiado à CUT, assim como as iniciativas em marcha.
Foi precisamente ao apelo da CUT que diversas forças políticas e coletivos sociais se reunírom para planificar umha resposta popular contra a injustiça que o nosso companheiro Miguel está a viver.
As organizaçons que atualmente integram o Comité som ADIANTE, AGARB, AMI, Asociación de Amizade Galego-Cubana Francisco Villamil, BRIGA, CEIVAR, CUT, Espaço Irmandinho, FPG, CS LUME!, NÓS-UP, Primeira Linha, PCPG e CS A REVOLTA.
Apoios internacionais
Luzia Leirós destacou os muitos apoios internacionais que está a receber Miguel. Agradeceu as adesons das organizaçons Izquierda Castellana, Corsica Libera, Coordinadora Obrera Sindical dos Paísos Catalans, Movimento Popular Democrático do Equador, Movimento Caamañista da Republica Dominicana, Askapena de Euskal Herria, Colectivo Amauta e Catédra Che Guevara da Argentina, colectivo comunista Política Operária de Portugal.
Posteriormente apelou a que todas e todos os trabalhadores, todas as organizaçons obreiras e colectivos sociais e vizinais colaborem e se somem às atividades de solidariedade e apoio com Miguel.
Liberdade para Miguel
O Comité constitui-se com o objetivo claro de exigir a liberdade imediata para Miguel Nicolás Aparicio. Um jovem ao que só se lhe pode acusar do delito de ser um moço comprometido, coerente, generoso e valente, defensor dos direitos da classe ao qual pertence, a classe obreira.
O CSAM quer dar umha resposta popular contra esta acçom repressiva, visibilizar a injustiça que esta a sofrer o jovem trabalhador, dar-lhe ânimo e arroupo nestes momentos, e conseguir o apoio económico necessário para pagar os custos do processo e as necessidades de Miguel dentro da cadeia.
Luzia Leirós lembrou que Miguel foi detido 15 de dezembro sob acusaçom de atacar um escritório de emprego. Que depois de estar 72 horas na esquadra policial, foi transladado à cárcere da Lama para cumprir prisom provisória.
A situaçom atual na que se acha o nosso companheiro demonstra que sobre Miguel querem escarmentar a todos e todas as jovens que tentem defender os seus direitos laborais e sociais.
Tipificado como FIES
Telmo Varela, secretário comarcal da CUT Vigo, explicou que a polícia espanhola está tratando o caso de Miguel como se existisse umha sentença firme e tivesse sido julgado, como se Miguel fosse um perigoso delinquente. A polícia mantém o segredo de sumário desde o momento da detençom, o que impossibilita obter maior informaçom sobre o processo repressivo. Nesta semana mudarom-no de módulo penitenciário -do número seis ao número um-, onde as condiçons som muito piores. Por outra banda, o seu caso também foi transferido do julgado número quatro ao número cinco.
Miguel está sequestrado dentro da prisom ao denegar-se-lhe ilegalmente as visitas de companheiros e companheiras. Assim, passado sábado 22 de janeiro, se lhe negou a visita a um amigo e umha amiga, que tinham todas as autorizaçons em regra, polo que foi impossível ter contato com o jovem.
Na passada semana Miguel foi incluido nos F.I.E.S (Ficheiro de Internos de Especial Seguimento), polo qual está sendo intervida toda a sua correspondência.
Ante a gravidade da situaçom, o Comité quer denunciar que a injustiça que esta a sofrer Miguel, nom é algo isolado, forma parte de umha estratégia planificada polo poder político e económico para calar todas as vozes que nom se resignem a viver oprimidas.
Na atualidade os e as trabalhadoras vivemos numha situaçom muito complicada por culpa da crise do sistema capitalista, e por culpa de todas as reformas aprovadas nos últimos dous anos polo governo do PSOE. Na Galiza há 68.000 jovens no desemprego, e @s que tenhem emprego é na imensa maioria com contrato precário.
Som múltiples os exemplos das agressons que estamos sofrendo @s trabalhadores: a nova reforma laboral do ano 2010, o abaratecimento do despedimento, a reforma das pensons e o aumento da idade de jubilaçom aos 67 anos, o aumento do IVA um 2%, de 400€ ao ano mais na factura da luz ou a retirada da ajuda dos 426 € para @s desempregad@s aos quais se lhe rematou a prestaçom.
Esta conjuntura é proclive a que o movimento obreiro se organize para defender os seus direitos. Miguel é um trabalhador organizado na CUT e como bom ativista sindical fôrom precisamente a suas revindicaçons as que propiciárom que sobre ele caia todo o pêso da repressom.
Convocadas novas mobilizaçons
Finalmente Xavier Moreda deu a conhecer as diversas iniciativas e mobilizaçons preparadas para os próximos dias polo Comité.
Concentraçom terça-feira 1 de Fevereiro às 20 horas no Mercado do Calvário como primeira concentraçom que se desenvolverá todas as primeiras terças-feiras de cada mês em diferentes bairros obreiros da cidade de Vigo.
Concentraçom na Lama Domingo 13 de Fevereiro às 12h. Sairám autocarros às 10.30h desde a rua Venezuela (junto aos Salesianos).
Para poder fazer fronte aos gastos da campanha e às necessidades de Miguel na prisom fôrom editados bonos solidários e está aberta umha conta solidária: 2080-0079-90-0040012553 (Novacaixagalicia)
Finalmente o Comité deu a conhecer o seu blogue:
http://csamiguel.blogspot.com/
Nenhum comentário:
Postar um comentário