CSAM solicita liberdade de Telmo e Iussa

                      

Perante as detençons realizadas ontem em Vigo, -véspera do Dia da Classe Obreira Galega-, pola Guarda Civil e a Polícia espanhola, o Comité de Solidariedade e Apoio a Miguel quer transmitir:

1. Manifestamos a nossa total solidariedade com os companheiros José Maria Prado (Iussa) e Telmo Varela, atualmente detidos na Comandáncia da Guarda Civil de Ponte Vedra, e exigimos a sua imediata posta em liberdade. 
2. Denunciamos esta nova operaçom dos corpos repressivos do Estado espanhol contra dous trabalhadores conscientes e comprometidos com a sua classe e com a Galiza. O recrudecimento da repressom contra o movimento obreiro e popular galego por parte do Estado espanhol nom é casualidade, enquadra-se no contexto de crise do sistema capitalista e procura eliminar os setores mais combativos e conscientes. 
3. Como sempre, os meios do regime, escrevendo ao ditado do Ministério do Interior, começárom umha campanha de intoxicaçom e criminalizaçom contra Telmo e Iussa. Longe da falsa visom que agora pretendem apresentar, Telmo e Iussa som trabalhadores do naval, bem conhecidos em Vigo polo seu compromisso sindicalista na CUT e pola sua implicaçom em diversos movimentos populares da cidade. Telmo Varela é Secretário Comarcal da CUT de Vigo e porta-voz do CSAM. 
4. Como somos plenamente conscientes do que acontece no interior das esquadras dos corpos repressivos manifestamos a nossa preocupaçom pola situaçom atual de Telmo e Iussa, e solicitamos às autoridades espanholas plenas garantias da integridade física de ambos luitadores. 
5. Fazemos um apelo a umha resposta solidária unitária e contundente. Hoje, como em 1972, a repressom é a arma que o Estado espanhol utiliza para tentar afogar a resposta obreira mais coerente à crise do capitalismo. Mas, como em 1972, a sua repressom só servirá para criar mais consciência de classe e mais luitadores e luitadoras. 

Liberdade para Telmo, Iussa e Miguel, já! 

A luita é o único caminho! 

Comité de Solidariedade e Apoio a Miguel 

Vigo, Galiza, 10 de março de 2011